നടി സമാന്തയുടെ വിവാഹത്തിന് പിന്നാലെ ചർച്ചയായി മുൻ ഭർത്താവ് നാഗചൈതന്യയുടെ കുറിപ്പ്. അദ്ദേഹത്തിന്‍റെ ഒരു സിനിമയെക്കുറിച്ചാണ് പോസ്റ്റെങ്കിലും അതിലെ വരികളാണ് ചർച്ചക്കിടയാക്കിയിരിക്കുന്നത്.

വിവാഹത്തെക്കുറിച്ചോ സമാന്തയെക്കുറിച്ചോ ഒരു വാക്ക് പോലും പോസ്റ്റിൽ ഇല്ല, പകരം കലയോടുള്ള ആത്മാർത്ഥതയെക്കുറിച്ചും അത് പ്രേക്ഷകരിലേക്ക് എങ്ങനെ എത്തുന്നു എന്നതിനെക്കുറിച്ചുമെല്ലാമാണ് പോസ്റ്റ്.

‘‘ഒരു അഭിനേതാവ് എന്ന നിലയിൽ, സർഗാത്മകതയിലും സത്യസന്ധതയിലും ഊന്നി ഒരു തിരഞ്ഞെടുപ്പ് നടത്തുകയും, അതിൽ നിങ്ങളുടെ കഴിവിന്‍റെ പരമാവധി നൽകുകയും ചെയ്താൽ... പ്രേക്ഷകർ അത് സ്വീകരിക്കുമെന്ന് ‘ദൂത്ത’ തെളിയിച്ചു. അവർ അത് ഇരുകൈയും നീട്ടി സ്വീകരിക്കുകയും ആ ഊർജം നിങ്ങൾക്ക് തിരികെ നൽകുകയും ചെയ്യും. നന്ദി! ദൂത്തയുടെ രണ്ട് വർഷങ്ങൾ! ഇത് യാഥാർത്ഥ്യമാക്കാൻ പ്രയത്നിച്ച മുഴുവൻ ടീമിനും സ്നേഹം.’’

എന്നാൽ നാഗ ചൈതന്യയുടെ പോസ്റ്റിന് താഴെ കമന്‍റുകളുടെ ബഹളം തന്നെയായിരുന്നു. അഭിനന്ദനം അറിയിച്ചവർക്കൊപ്പം വിവാഹത്തെക്കുറിച്ച് ഓർമ്മിപ്പിക്കാനെത്തിയവരും കുറവായിരുന്നില്ല. ‘നഷ്ടപ്പെട്ട വജ്രം’ എന്ന കമന്‍റാണ് പലരും ആവർത്തിച്ച് കുറിച്ചത്.